香港米芝蓮只得中菜值得享譽？
image source: 米芝蓮指南官網
香港米芝蓮2024 早前喺 3月14 號出爐，多間奪星餐廳勁快手已經Po晒得獎圖上社交平台，都咪話唔威！今年總共有 79 間香港餐廳突圍而出，咁多間睇到眼花？今日就等網路溫度計用大數據話你知，近一年港米芝蓮 TOP 10 網路熱門討論排行！唔好講咁多，食咗先講啦！（看每日最新「米芝蓮餐廳熱度排行榜」請點我）
DV小教室：網路溫度計透過《KEYPO大數據關鍵引擎》，觀測、爬梳港澳地區數萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.10 L'Atelier de Joël Robuchon (368筆)
「如果生日或拍拖、結婚週年紀念想同另一半食餐好嘅，揀邊間好？在線等！」，相信唔少網友都非常之頭痕，到底食浪漫好定食好西？Why not both! 今年米芝蓮都有唔少西餐廳奪星，但講到聲量，呢間 L'Atelier de Joël Robuchon 係唯一討論度最高嘅法國餐廳！餐廳行簡單奢華路線，賣相、食物水準同份量一流，可以打卡同滿足味蕾，最後主廚仲會同大家傾計，用餐體驗爆分！
網民：「抵佢咁多年都有三星！」
NO.9 大班樓 (487筆)
講到大班樓就真係唔惹小！事關佢做粵菜做到世界聞名，想訂都好難訂！今年除咗奪得米芝蓮一星，更成功擠身「亞洲 50 最佳餐廳」第二名，多年嚟一直憑著招牌菜「雞油花雕蒸花蟹」和「樟木煙燻鵝」獲得唔少食客支持！咁成功就當然有人會眼紅啦，舊年十月，有間又係叫「大班樓」嘅鋪喺馬來西亞開，無論係店名、標誌同色調都同香港嘅好似，仲以為係當地開分店，大班樓澄清之後先知畀人偷咗個名⋯⋯
網民：「非常難Book，食到係三生有幸！」
NO.8 香宮 (599筆)
香宮喺九龍香格里拉酒店嘅中菜餐廳，今年再拎米芝蓮一星，食物水準乃至成個用餐體驗出色是常識吧。不過，早喺米芝蓮出爐之前，有位專拍食評嘅Youtuber 「有碗話碗」自費親身體驗，評論中肯，更直言質素麻麻地，直抽當期時另一位Youtuber「文苑飯莊打手」熱話，引起網友們讚賞佢對香宮嘅真實反應！
網民：「有Discount 可以食嘅⋯⋯」
NO.7 甘牌燒鵝 (610筆)
香港咁多間餐廳賣燒鵝，而甘牌燒鵝連續咁多年都榜上有名，由名店鏞記第三代開出嚟，係咪真事就不得而知，但日日都有遊客起碼排成個鐘堂食就係真嘅，唔少人仲會買去M記食，到底係咪咁好味呢？多位Youtuber 都有真實拍攝，認為呢間環境窄迫，燒鵝乾身仲有大把好食過佢，嗱，口味呢家嘢見仁見知，都好睇當日運勢，係咪唔值？試咗先講啦！
網民：「淪為旅遊景點！」
NO.6 福臨門 (973筆)
福臨門應該冇咩人唔識，話晒都叫做富豪飯堂，大劉、李嘉誠、李澤楷、謝賢都好鍾意去，但有傳好似家道中落，因為欠債超過9,000萬而隨時遭人清盤。最搞笑係老細炒咗廚藝了得嘅大廚，大劉一食乾炒牛河就知唔對路，重新請佢哋返嚟做家廚。有時候做生意下下計到盡，真係得不償失！依家連假日晚市都水靜河飛，遲下呢間傳統老店可能捱得住疫情，捱唔到自己！
網民：「睇嚟要成日落旺角畀星探發掘！」
NO.5 一樂燒鵝 (1,077筆)
一樂燒鵝深受遊客嘅喜愛，登上小紅書後再度被捧上香港燒鵝界No.1，但意外地更出名嘅唔係燒鵝，而係老闆娘朱太舊年同內地旅客因土地問題起爭執，畀網友戲稱「一樂燒鵝MMA」，而普遍香港網友表示「名過其實，老細長期食炸藥，又唔好味，唔明點解會變咗做名店。」，講就咁講，但上米芝蓮總係有佢嘅原因嘅，下次經過中環不妨試下先！
網民：「搵遊客錢都唔憂做！」
NO.4 唐閣 (1,137筆)
唐閣連續9年摘米芝蓮三星，喺香港出晒名服務態度夠好又細心，照顧到每位客人嘅需要，嘢食超晒班，尤其係招牌菜「釀焗鮮蟹蓋」，啖啖肉，個個都食過返尋味！而且適逢新年等特別節日仲會匯集創意推出新菜色，對於客人嚟講又多一個去book 檯嘅動力。雖然貴，但品質不嬲都好有保證，唔少人都極推呢間係真正嘅米芝蓮三星！
網民：「搞到我立刻想去食！」
NO.3 嘉麟樓 (1,240筆)
是咁的，雖然嘉麟樓係食中菜嘅，但每年七月八月開始網路討論度就會突然變高，事關佢出名嘅係月餅⋯⋯ 有幾咁威水？曾經有人因為畀人搶走月餅而上港聞版嘅就係嘉麟樓嘅奶黃月餅，到底有咩咁特別？因為人人都知佢賣成$700，送禮夠晒有面子。不過嘉麟樓嘅中菜都有驚喜，點心水準、賣相唔錯，食Brand 都抵！
網民：「半島都係食個名啫！」
NO.2 富臨飯店 阿一鮑魚 (1,266筆)
臨飯店除咗食鮑魚仲有唔少菜式都非常受歡迎！例如係炒飯，而創辦人楊貫一嘅烹飪哲學係「味美型潔「，直頭喺客人面前炒埋，睇埋表演食餐飯夠晒享受！只可惜「一哥」舊年年中享年90歲就因病逝世，但行政總廚依然緊緊追隨一哥嘅腳步，繼續提供同樣嘅飲食理念畀客人！
網民：「平民米芝蓮！」
NO.1 新同樂 (2,403筆)
新同樂歷史悠久，早喺六、七十年代已經係富豪級飯店，爵士級人馬如邵逸夫爵士都成日去食，重點招牌係魚翅、象拔蚌等海鮮。雖然中間一度不敵金融風暴執笠，但十年後東山重起，更成為米芝蓮一星食府。餐廳有時代感，唔代表佢冇進步！因為新同樂嘅菜色一直與時並進，至於不變嘅係，服務態度依舊非常香港。
網民：「畀錢買難受」
【以上圖文為香港網路溫度計調查結果，未經授權請勿轉載改寫】
分析說明：
本研究資料由《KEYPO大數據關鍵引擎》提供，分析時間範圍為2023年5月2日至2024年5月1日。KEYPO觀測港澳地區萬個網站頻道，包含新聞媒體、Facebook、Instagram、YouTube、小紅書、Twitter及各大討論區、BLOG等，針對本議題相關文本內容進行分析，並根據網友就該議題之討論，作為內容撰寫依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
分享本篇文章
你可能也會喜歡這些文章 :