香港人成日都話「一代不如一代」，認真咩？時代變，人物風景都改變，香港娛樂圈都總算有啲新血，個個有實力之餘，又型又靚！不過你又識幾多位新生代男星呢？今日就跟著網路溫度計，細數香港TOP 10 新生代男星！睇下你Follow 開嘅明星有冇上榜啦！
DV小教室：《網路溫度計DailyView》透過KEYPO大數據關鍵引擎觀測、爬梳港澳地區2萬個公開網站頻道，包括新聞媒體、各大Social Media、Forum以及Blog，從中取得資料樣本數，並以AI語意程式作數據分析。「網路熱度」為主題項目相關的網路Posts和Comments ，數值愈大代表項目的討論度愈高。
image source：翻攝自中時娛樂網
魏浚笙係混血兒，2020年出演ViuTV電視節目《調教你男友》因為外型出眾，非常靚仔而人氣急升，除咗靚仔，實力都有反咁上下，出歌橫掃各大新人獎！更成為品牌們嘅新寵，廣告接到手軟，不過最近因為喺《拉闊》嘅表演未如理想，被質疑係咪掛住去巴黎睇Fashion Show 冇排練，事後喺Threads 上發文道歉，唔係因為睇Show，而喺本身跳舞底子唔夠好，希望大家可以體諒佢啦！
網民：「明星唔係大晒，但靚仔一定係！」
邱傲然喺MIRROR 12子年紀最細嘅成員，身高比較蝕底，但勝在人細心沉穩，梁祖堯都讚過佢悟性高，出道以嚟，除咁唱歌、拍劇，仲試過為MIRROR 《破鏡》MV執導，更獲鮮浪潮邀為《第十七屆鮮浪潮國際短片節》拍開幕短片《是日精選》，認真多才多藝！而佢細妹Kelly 近日因為Cover 舊歌都備受關注，唔知日後有冇機會見到兩兄妹一齊出歌呢？
網民：「Tiger 性格真係唔錯，期待之後做埋導演！」
陳瑞輝喺MIRROR 公認高顏值又唱得Talk得，仲要勁搞笑，呢種多元化發展令佢喺唔同領域都有所斬獲。不過近嚟就有紅顏禍水！事關佢公開新女友Christy 後，被揭發疑似偷食事件，女友Christy 被公開社交平台，大量令人嘩然嘅貼文流出，MIRROR經理人花姐同時間出文，被網友質疑有嘲諷意思，非常耐人尋味⋯⋯
網民：「提晒水叫佢斬纜！」
王嘉爾早喺韓國以GOT7 成員出道，喺亞洲各地積累咗大量粉絲！團體解散後，佢轉戰到中國發展，憑藉語言同個人魅力成功喺中國打開新市場，除咗專注音樂，佢仲創立咗自己嘅品牌TEAM WANG，進一步鞏固咗自己嘅事業版圖。近日現身Louis Vuitton 2025春夏巴黎男裝大秀之餘，更聯同數位拍賣平台Joopiter 策劃拍賣項目，所得收益將用於慈善用途，睇嚟今年佢都有排忙。
網民：「依家啲小朋友唔知佢曾經都係韓團出身⋯⋯」
MIRROR 成員柳應廷擔任主唱，其實力冇人質疑嘅，近日佢就公開即將同張天賦（MC）開音樂會，兩人早喺《全民造星》時期認識，無論係聲音定台風都相似，到時一定會擦出火花！但柳應廷曾經被捲入桃色風波，女網紅將佢DM 嘅內容Cap 圖，疑似Flirt 女網民，而網友認為「好正常回覆咋喎」，你又點睇？
網民：「一定係Edan 教壞隊友」
陳卓賢撇開MIRROR成員唔講，其實佢都係一名全方位唱作歌手，舊年已推咗4首自己作曲新作品，聽到Fans 出晒耳油！唔好睇佢似樹熊，以為佢好呆，其實佢細個仲係排球選手，更代表過南華出戰，認真犀利！不過生性內向又執著嘅佢，都傳佢曾經因為得罪高層而被雪藏，不過唔驚啦，依家又出歌，嚟緊七月又搞演唱會，各位Hellosss 一定好興奮！
網民：「召喚房屋署署長羅淑佩。」
啱啱出新歌《月光奏明曲》嘅MIRROR成員呂爵安，今次一改以往搞笑形象，以惡魔形態出現，點題講社會病態，引起唔少網友熱討！除咗唱歌，佢喺戲劇上更有突破性演出，唔單只嚟引粉絲，更喺《男排女將》、《大叔的愛》、《社內相親》都以誇張、真實嘅演技搏得大眾關注！不過有網友表示佢成日衰多口，搞到採訪成日畀佢「劖亂歌柄」，引發歌迷大戰。
網民：「成日都見到佢，出鏡率100%！」
李駿傑呢期忙到感冒都冇時間，又出席品牌活動又演唱會，成個空中飛人仲要感冒真係辛苦晒，不過點都好，因為佢終於見到自己偶像鄭秀妍 Jessica，嗰日好興奮仲大晒親簽同合照，追星成功固然開心，但前排鏡粉去《12怪盜》謝票場時懷疑秩序失控，包圍姜濤大叫，連佢平時溫柔開嘅人都臉有不悅直呼：「可唔可以讓返條路。」，理智追星好重要！
網民：「默默努力唔容易！」
盧瀚霆未出道就已經被網友批評濃妝豔抹，一點都唔Man，尤其劇集《社內相親》被批太白，一啲都唔似霸道總裁。不過時代變啦，盧瀚霆用自己話畀大家聽，男仔一樣可以靚！而且教主點止外貌出眾，唱歌、跳舞一樣難佢唔到，畢竟佢以前就已經係郭富城同陳慧琳嘅伴舞！而佢嘅粉絲同偶像一樣都係咁有愛，年年Anson Lo 生日都會搞應援活動，今年仲捐門票畀慈善團體！
網民：「審美同以前唔同咗」
姜濤被譽為香港新一代頂流偶像男星，身材、一舉一動都受到網友們嘅放大檢視，肩負嘅壓力自然唔細，而佢嘅粉絲默謝票場事件影響到其他人被受責罵，佢都感到好苦惱。雖然係咁，有另一班支持者選擇用行動反映對偶像嘅愛，姜濤後援會喺佢生日都會請市民免費搭電車，仲逼爆銅鑼灣！唔怪得姜濤前幾日為粉絲大跳《晚安大小姐》嚟回饋Fans 支持啦！
網民：「明星維持好自己身材，都係工作之一。」
以上就係香港新生代男星TOP 10，唔知對你嚟講熟唔熟悉呢？其實香港樂壇或娛樂圈都不斷有新人加入，我哋不妨以樂觀嘅心態嚟欣賞同鼓勵佢哋，令香港藝人可以持續地發光發熱，重拾90年代嘅普日光輝！
【以上圖文為香港網路溫度計調查結果，未經授權請勿轉載改寫】
分析說明：
本研究資料由《KEYPO大數據關鍵引擎》提供，分析時間範圍為2024/3/21-2024/6/20。KEYPO 觀測港澳地區萬個網站頻道，包含新聞媒體、Facebook、Instagram、Youtube及各大討論區、BLOG等，針對本議題相關文本內容進行分析，並根據網友就該議題之討論，作為內容撰寫依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
本篇分析報告使用「KEYPO大數據關鍵引擎」輿情分析系統