搵定張紙巾抺口水！香港最肌男藝人

唔好睇喺愛回家入面神之馬壯淨係得把口啊。現實生活中黎諾懿除左有把口仲有一個好身材！之前同老婆去布吉旅行嘅時候就post左一條喺infinity pool拍嘅片，結實肌肉表露無遺，佢真係唔聲唔聲嚇你一驚啊！

Bosco近年周不時都會喺social media大show好身材，派福利比fans。其實Bosco身材一向都唔差，只係瘦左小小。不過為左拍健康產品廣告操一操就操到依家呢一身近乎完美嘅身材。Bosco之前都有講過自己好注重身型同健康，平時食得清淡，也勤力做運動，如打籃球、做Gym、游水等。

普通話麻麻嘅渣渣輝，身形一啲都唔渣啊！佢曾經喺電影《激戰》入面露出佢一身結實嘅肌肉，睇到啲觀眾流哂口水，都唔知睇佢定睇劇情好啊。原來呢一身肌肉都得來不易架，佢足足練左九個月每一日練六七個鐘練翻呢架！仲要戒鹽油糖，每日食二至三十隻雞蛋白增加蛋白質。唔係人人做到啊！

又一「肥仔」變「大隻佬」嘅陳豪，又係因為喺《誇世代》赤膊爆肌攀石嘅戲份入面，以超強壯手臂捉實岩壁盡顯力量美而俾人發現原來佢做咗爸爸都一樣咁fit，一啲都無中年發福！唔講唔知原來張繼聰係佢半個師傅啊！佢話係張繼聰一開始幫佢搞好個身體，再帶佢去做Gym，不斷喺佢身邊鼓勵佢！唔怪得兩個都一樣咁fit啦！

身為前香港泳隊嘅Dickson除咗有對迷人嘅笑眼，仲有傳說中四十吋嘅胸肌𠻹啊！本身係體育台外景主持同兒童節目主持人嘅Dickson因為《誇世代》而為到矚目，佢喺劇中都有show佢健碩嘅身材，迷倒一眾少女。前排Dickson踢波踢到一半昏迷入左ICU，全城都為佢集氣可見佢有幾受大家喜愛，好彩依家已經無事喇！

以前瘦削嘅張繼聰因為老婆謝安琪一句「身型似未發育嘅中學生，著恤衫領口都係鬆嘅。」的起心肝操fit自己。不過佢之後就喺健身過程中學到「健身唔係為左消閒或者炫耀，而係自我價值，因為無翻咁上下時間唔會會有成績，而係每天須不斷重覆嘅過程」所以話好身材得來不易，首先要學識持之以恆。

以為以幽默感取勝嘅男明星就唔會有好身材？咁你就錯哂啦！想當年杜汶澤半年內由一個「肥仔」變成「大隻仔」引起哄動。估唔到到依家佢都仲保持佢fit爆嘅身材啊！為左保持身材佢仲講過話「唔理有咩設備，只要有廿四小時開放的健身室，就係頂級酒店！」

天堂哥袁偉豪係港男出身就當然有翻咁上下大隻身材啦。Benjamin唔止平時post下社交媒體連拍劇都毫不吝嗇show佢fit爆身材啊！身為運動男生，Benjamin平時都好中意水上運動，之前仲試玩埋衝浪，健身又得水上運動又得，俾佢玩哂啦！唔怪得迷倒一眾少女啦。

年過半百嘅郭富城依然魅力沒法擋，仲保持到佢健碩身材。而佢喺演唱會上都成日大show佢嘅身材。究竟佢係點保持到咁好嘅身材呢？之前佢受訪嘅時候話有幾點好重要「堅持每日跑步游水」、「嚴守飲食守則」、「唔做高強度運動 以免中途以廢」。想操fit自己嘅讀者記得mark低佢啊！

金牌主持人森美平時主持就著住套西裝包到密密實實，估唔到佢西裝底下竟然有咁好嘅身材啊！佢就曾經透露係因為拍《誇世代》，所以開始佢嘅操肌計劃，用咗大約三個多月操到劇中嗰個樣。劇中佢喺擂台上激戰，聚光燈打喺佢身上，fit爆身材表露無遺，令觀眾流哂口水。