盤點中港台小三 8段被小三破壞嘅姻緣

唔係得娛樂圈中人嘅愛情故事先夠「蕩氣回腸」，寫出好多經典愛情文學嘅瓊瑤，原來依家呢段婚姻都係「小三扶正」嘅故事。瓊瑤老公平鑫濤嘅前妻林婉珍係舊年出書，講返瓊瑤當年點樣介入佢段婚姻。對此瓊瑤嘅回應係，佢由始至終都係以愛之名同平鑫濤來往，佢地婚姻結束係因為緣份已盡，寫書嘅人真係講嘢都文藝啲。

講名可能都無乜印象，Liddy當年做o靚模出道，被蘋果日報影到同李心潔老公—導演彭順係商場拖手錫嘴樣樣來，當場斷正，彭順當然被鬧爆，即刻飛去馬來西亞同老婆認罪。Liddy形象插水根本接唔到job，加上家庭發生巨變，一度淡出娛樂圈。搭上有婦之夫，結果人地夫妻和好，只有自己得不償失，真係慘痛嘅代價。

都話人生如戲，陳昱霖係舊年爆出佢同吳秀波嘅7年婚外情，嚇傻一班網友之餘，仲重挫吳秀波嘅形象。而佢父母透過微博控訴吳秀波呃個女返中國商討分手事宜，但另一邊又安排公安捉咗陳昱霖，發展非常戲劇性。憑住咁樣嘅操作，曾被內地傳媒稱為「中國影視圈第一好男人」嘅吳秀波目前榮登第一渣男。

生得靚可能真係一種罪。Elanne最令人印象深刻莫過於當年佢媽媽攞本紅簿仔，用$58存款證明佢無受到「特別照顧」，來撇清佢無介入老細林小明婚姻。就喺舊年（2018年）同十年好友Oscar宣布結婚後，都被Oscar嘅前女友Charmaine暗指當年Elanne做第三者撬牆腳，不過今次有未婚夫即刻出來護愛，同大家講清楚兩段戀情根本無重疊。

好耐無係TVB出現嘅Niki，2018年年底宣布結婚，老公喺中國內地演員傅浤鳴。Niki同傅浤鳴喺2014年因劇結緣，傅浤鳴2017年3月先同結婚20年嘅原配程愫離婚。而喺2017年壹週刊就影到過傅浤鳴係6月來過香港同Niki同出同入，大陸網友紛紛留言戥原配唔抵，表示Niki結婚喺「小三上位」，睇來呢段姻緣並唔係太被睇好啊。

鄭俊弘阿Fred係隱瞞自己有未婚妻嘅情況下，同何雁詩保持幾乎每日Uber接送嘅「友誼關係」。初時接受媒體訪問嘅時候，阿Fred都堅持何雁詩唔係第三者，堅持大家係朋友。而阿Fred係同未婚妻分手後，正式認愛何雁詩後，可惜呢段小三扶正嘅戀情唔受網民祝福，阿Fred無縫接軌嘅行為亦被封為世紀賤男。

年輕貌美嘅經理人同已婚嘅藝人，要學識避嫌應該是常識吧？演員張丹峰就被內地媒體爆出同經理人畢瀅係在外拍戲時，共處一室到凌晨。畢瀅同張丹峰之前就傳出過緋聞，當時張丹峰太太洪欣以大方嘅姿態，共同接受訪問並表示相信老公。再次爆出曖昧的互動，睇來夫妻之間再深厚嘅信任，都不敵日夜係身邊嘅誘惑。

喺嗰段長達16分鐘嘅影片俾蘋果流出來之前，相信「安心」呢個組合都幾出乎大家意料。有幾分姿色嘅心穎BB，同馬明保持情侶關係之際，亦多次同拍劇對手傳出緋聞，但係今次仲有有片斷正。錯就錯在今次撻著嘅對象，喺被黃子華稱為「香港少有嘅愛情童話」，兩個受害者Sammi同埋馬明都有咁高人氣，難免俾人插到飛起。

其實另一半偷食真係防不勝防，最驚就係狐狸精其實潛藏係身邊同一班朋友圈，平時朋友聚會啊、食飯啊都會見到對方。大家平時關係都唔錯，甚至會一齊合照，一齊約出去，但係一啲都唔為意原來對方對自己另一半心思思。暗渡陳倉呢啲嘢，有時候就真係一個來電嘅moment，就足以令成件事唔同曬。

有啲狐狸精衰得來，但勝在夠坦蕩，覺得搶人地老公/男朋友喺緣分嘅安排（請看前輩瓊瑤）。而最讓人恨的牙癢癢嘅狐狸精呢，就係嗰啲一副扮無辜，講到自己無心破壞人地幸福咁款。明明自己就係罪魁禍首，仲要扮驚訝點解佢地會因為自己而鬧交，擺出個姿態好似俾全世界誤解咁款。說穿其實就喺綠茶婊，明明心懷不軌仲要扮清純。

相信拍緊拖嘅大家，最忌就係喺另一半嘅社交媒體上，見到有另一個異性頻繁地留言同互動。呢招非常高明，喺社交媒體咁公開嘅場合，計較又顯得自己太小氣。但係睇住對方喺自己另一半嘅post即like即留言，一副交情好好咁樣，又真係好難唔介意。有啲小三戀情，都可以喺呢啲社交媒體上發酵，互動密咗就好容易從公開嘅留言到私底下來往，跟住就出事架啦。