片／萬眾期待18年之約！《莎木3》經典再現，好唔好玩？
打機，除咗好玩，仲有一種情懷。呢種情懷，有人會話係懷舊，有人會話係集體回憶，有人會話係男人浪漫。金庸小說《神雕俠侶》，楊過、小龍女尚且都係16年...
Image source：FB／鬧著玩 NowzPlay
文／積遜猿
日本SEGA製作嘅動作冒險遊戲系列，《莎木》系列第一作喺1999年正式發售，DC平台獨佔嘅《莎木 一章 橫須賀》。第二作喺2001年，《莎木II》首賣，兩作均大受歡迎，呢個系列嘅故事尚未完結，但可惜一直都無續作出現。直到2015年，系列製作人鈴木裕喺SEGA攞返莎木IP嘅使用許可，正式喺Kickstarter平台發起募資，開始製作《莎木3》，幾經延期之後，2019年11月19號，喺PlayStation 4同Windows平台上發行。等咗咁耐，香港人終於有得再玩《莎木3》喇！
2019年3月9號，喺摩納哥舉辦嘅「摩納哥動畫遊戲國際會議 2019」，由鈴木裕領軍製作嘅《莎木》系列最新作《莎木3》發行遊戲內容嘅宣傳影片，即時引起大批Game迷嘅關注。呢段名為「涼與大師」嘅影片，玩家終於見返期待已久嘅《莎木》系列主角「芭月涼」同「莎花」，隔咗咁耐，睇返高畫質嘅男女主角，認真吸引。難怪咁多網友睇完條片，都話就算18年，都依然好熱切咁等緊！
Image source：《KEYPO大數據關鍵引擎》分析期間：2018/11/23-2019/11/22。
根據網路大數據《KEYPO大數據關鍵引擎》圖表可見，《莎木3》嘅香港網路討論聲量嚟睇，會睇到兩個高位，其中一個喺6月，另一個則喺11月。點解會咁？緊係因為同《莎木3》有關嘅重要事件出現。
等完又等，《莎木3》隔咗咁多年再出，並唔係咩爭議都無，其中6月期間就發生官方同玩家嘅衝突。皆因《莎木3》PC版本話會獨家喺Epic Games商城發售，但係因為原先官方承諾會喺Steam等平台登陸同發售遊戲，好多Game Fans得知消息之後覺得俾官方背叛同欺騙，引起咗唔少原先遊戲支持者負評連連，仲有有人話要要求退款。而官方就咁樣回覆：「雖然就突然改變遊戲平台表示歉意，但不會就此退款。」呢件事，當然引起網路上好多爭執喇。
不過絕大多數嘅玩家等咗成18年，又點會咁輕易放過玩呢隻充滿懷舊、集體回憶同埋男人浪漫嘅遊戲？2019年11月19號，《莎木3》正式公開喺全球發售，即時引發《莎木3》嘅網路聲量去到最高位！好多香港Game迷買咗隻《莎木3》，緊係要分享自己玩咗隻Game嘅經驗，問吓點樣玩先唔會卡關。更重要嘅係，到底呢隻經典遊戲，18年之後，滿唔滿足到新舊玩家嘅要求？我哋一齊睇睇香港網民點評價：
「畫面都接受到，卡通化，唔係真實化。圓頂山係好假，如果整到 MHW 風景就正！當係玩動物之森，不停同NPC互動。」
「尋晚一聽到d音樂，見到涼仔同莎花係山洞入面行，真係有少少眼濕濕，如果唔係我係廳玩，而係一個人係房玩應該喊得出。」
「冇諗過自己過咗十幾廿年之後竟然仲可以玩到佢嘅作品。玩咗3日，今集完全無令我失望，如果下集都係要集資嘅話我都會繼續課！」
最新消息仲話，如果Fans滿意《莎木3》，想要《莎木4》嘅話，係有機會嘅，根據外媒IGN報導："Shenmue 4 Could Happen if the Fans Want It, Says Creator Yu Suzuki"。唔知大家又要等多幾多年呢？
